Gen 48 | TVK | STEP | Huram vahis mei mitavi, Siosep nggur sepinien tei xa bit, “Tamom li mesei.” Misak ni, mileh horamue nan xalu, Manase xal Efrem, e latoba tengan latosao ni.

Genesis 48

Sepinien Kor e Maten na Siekob

Senesis 48:1-6, 13-21; 49:8-10, 33

1 Huram vahis mei mitavi, Siosep nggur sepinien tei xa bit, “Tamom li mesei.” Misak ni, mileh horamue nan xalu, Manase xal Efrem, e latoba tengan latosao ni. 2 Melele xa Siekob milongeong ni xa natneli Siosep bemei tengan vapusi, xi nggeih ni xi tengan vatamea e dotan kuhi de vet man.

3 Siekob biteni mini bit, “Melele xa nateta tamu e ut Lus ^{▼▼48:3 Senesis 28:13-14} e tan tahal Kenan, Hi te Xeihen mei testal minou e tetuxol xat nou 4 e tehit, 'Inou nipol ni horamue nam xil mei lihe holu xa lihe holu pupu. Xil mei lihe vanut moletin xil xa ihe eilep. E tan ak, inou nisa ni mi vatimol nam xil tengan, vehakut, lito kat liti en.'”

5 Bus di, Siekob biteni mun bit, “Siosep, horamue nam xalu xa lutepot e hal Isip melele xa natnamei ti mu, inou nileh rat xalu mei lalihe navan xati. Reitin, Efrem xal Manase mei lalixoni horamue navan xalu ak, Ruben xal Simeon. 6 Horamue ti xil mun xa listal lixo xouk e huram xil xa ti imei, ngan xil ak lihe nam sung. E tan xa xil lilehi ra nou, lilehi ra ut xil xa nisa ni mi Efrem e Manase.”

13 Misak ni, Siosep miling Efrem e rin meil na Siekob, e miling Manase e rin metu. 14 E Siekob miling viles hen sung, e miling hen metu e vat Efrem, neta sav xa be tasite. E hen meil, milingi e vat Manase xa be muimol. ^{▼▼48:14 E sexien na Siu xil, merereen xa de he metu mili ngan xa de he meil.} 15 Di, duxol xat Siosep nggo horamue nan xalu bit,

“Hi xa Ebraham xal Aesak, tata navan xalu di lutehusili, xi ituxol xat horamue nam xalu ak.
Hi xa di milaxat kuh meulien navan duxoh xosali, xi ituxol xat xalu.
16 Masxaxa xa di tesikoe xol nou e melengien te xeih xil, xi mun ituxol xat xalu.
Ixo horamue xalu ak, moletin sav xil ti linem usil hisok e his tata navan xalu, Ebraham xal Aesak.
Horamue nalu xil mei lihe holu, e vatimol nalu lihe holu mak mu e ut etan.”
17 Melele xa Siosep pusi xa tamen miling hen metu e vat Efrem, xi tamaal pupu ti ven. Ma misak tengan vahur rat he tamen ra vat Efrem e valingi e vat Manase. 18 Xi biteni mi tamen bit, “!E-e, namak ti! Uling hem metu mei ite inggak e vat ngan ak xa be muimol.”

19 E tamen misen ni e bit, “!Natuxuli, inou nakila! Vatimol na Manase mei lihe tetit moletin tei xa ihe eilep. E vatimol xil xa listal lixo tuneli xa be tasite mei lili nan xil, e mei lihe vanut moletin xil xa lihe eilep mak mu.”

20 Ma di, duxol xat xalu e melele nen ak bit, “Mol-Isrel xil lihit usil xalu e melele te tuxolxatien lihit, 'Hi ituxol xatuk ixoni ngan xa tepol ni mi Efrem e Manase.'” Ma texo sexien ak, Siekob teling Efrem mei tetiamu ni Manase.

21 Bus di, Siekob biteni mi Siosep bit, “?Opusi? Sangas namat xiak. E Hi ite visaluk e ihur rilomun ni xouk uhe tan na avu nam xil.”

Di, Siekob mikes viton natneli sav xil, mei duxol xat xil e bit rerat holesok xil xa mei istal e vatimol nae xil e melengien xil xa ti imei. E mi Sudah, xi bit sepinien ak: